Maxfiylik siyosati

Oxirgi yangilanish: 2026-09-08

AsproCRM ("Xizmat") — bizneslar uchun mijozlar bilan ishlashni (sotuv, qo'ng'iroqlar, ijtimoiy tarmoq va veb-sayt orqali kelayotgan murojaatlarni) boshqarish tizimi. Ushbu hujjat Xizmat qanday ma'lumot yig'ishi, ishlatishi va himoya qilishini tushuntiradi — jumladan Facebook/Instagram integratsiyasi orqali olinadigan ma'lumotlarni ham.

Xizmatni «AND MASTER METALL» MChJ (STIR 306089249, Andijon viloyati, Oltinko'l tumani, O'zbekiston) yuritadi. «Asprofil CRM» va «AsproCRM» — shu kompaniyaning mahsulot nomlari. Ushbu siyosat bo'yicha ma'lumotlar nazoratchisi — o'sha kompaniya.

Qanday ma'lumotlar yig'iladi

• Xodim (operator/administrator) hisob ma'lumotlari — ism, elektron pochta, ish roli.
• Mijoz (lid) ma'lumotlari — Xizmatdan foydalanuvchi kompaniyaning ijtimoiy tarmoq/veb-sayt kanallari orqali murojaat qilgan mijozlarning ismi, telefon raqami, yozishmalari — faqat sotuv jarayonini boshqarish uchun.
• Qo'ng'iroq ma'lumotlari — qo'ng'iroq vaqti, davomiyligi va (agar yoqilgan bo'lsa) ovozli yozuvi — sifat nazorati va mijoz bilan aloqa tarixini yuritish uchun.
• Push-bildirishnoma tokeni — qurilmaga kiruvchi qo'ng'iroq/xabar haqida bildirishnoma yuborish uchun (Firebase Cloud Messaging orqali).
• Qurilma ruxsatlari (mobil ilova) — bildirishnomalar (kiruvchi qo'ng'iroq va xabarlar haqida ogohlantirish uchun), galereya (mijozga chatda rasm yuborish uchun).
• Ilova xatosi hisobotlari (mobil ilova) — ilovada xato yuz berganda o'z serverimizga texnik hisobot yuboriladi: xato matni va kod joylashuvi (stack trace), ilova versiyasi, platforma va ekran, hamda tizimga kirgan xodim hisobi va uning kompaniyasi identifikatori. Hisobot mijoz yozishmalari yoki aloqa ma'lumotlarini o'z ichiga olmaydigan qilib tuzilgan; u faqat xatolarni topish va tuzatish uchun ishlatiladi va uchinchi tomonlarga berilmaydi.

Facebook / Instagram integratsiyasi orqali olinadigan ma'lumotlar

Xizmatdan foydalanuvchi biznes o'zining Facebook sahifasi yoki Instagram professional hisobini Meta'ning rasmiy avtorizatsiya (OAuth) jarayoni orqali ixtiyoriy ravishda ulaganda, Xizmat quyidagi ma'lumotlarni Meta Graph API orqali oladi — faqat shu biznesning o'z mijozlariga oid:

• To'g'ridan-to'g'ri xabarlar (Direct/Messenger) — mijozning yuborgan matnli xabari, yuborilgan vaqti, mijozning ijtimoiy tarmoqdagi ID/ism-familiyasi (agar ruxsat etilgan bo'lsa) — operatorlarga javob berish imkonini berish uchun.
• Post/reels ostidagi izohlar (comments) — izoh matni, muallifi, izoh qoldirilgan post — biznesning avtomatik yoki qo'lda javob berishi uchun.
• Reklama lid-formalari orqali kelgan arizalar (Lead Ads) — foydalanuvchi Facebook/Instagram'dagi reklama formasida to'ldirgan ma'lumotlar (ism, telefon, elektron pochta va forma qanday tuzilgan bo'lsa, shunga mos boshqa maydonlar) — biznesga ariza sifatida yetkazish uchun.
• Sahifa/hisob asosiy ma'lumotlari — sahifa nomi, rasmi, ID'si — ulanganini ko'rsatish uchun.

Bu ma'lumotlar faqat shu sahifani ulagan biznesning o'z CRM hisobida ko'rinadi va faqat o'sha biznes xodimlariga (operator/administratorlariga) ochiq bo'ladi. Xizmat bir biznesning Facebook/Instagram ma'lumotlarini boshqa biznesga ko'rsatmaydi.

Ma'lumotlar qanday ishlatiladi

Yig'ilgan barcha ma'lumotlar faqat Xizmatdan foydalanuvchi kompaniyaning ichki CRM tizimida — mijozlar bilan ishlashni tashkil qilish, qo'ng'iroqlarni boshqarish, ijtimoiy tarmoqdagi murojaatlarga javob berish va sotuv jarayonini kuzatish uchun ishlatiladi. Ma'lumotlar uchinchi tomonlarga sotilmaydi, ijaraga berilmaydi yoki reklama maqsadida ishlatilmaydi. Xizmatning ishlashi uchun zarur bo'lgan cheklangan doiradagi provayderlar ma'lumotni biz nomimizdan qayta ishlaydi — ular quyida sanab o'tilgan.

Biz nomimizdan ma'lumotni qayta ishlaydigan uchinchi tomonlar

Quyidagi provayderlardan foydalanamiz. Ular faqat bizning ko'rsatmamiz bo'yicha ishlaydi, ma'lumotni o'z maqsadlarida ishlatishga haqli emas va har biri faqat o'z vazifasi uchun zarur bo'lgan qismini oladi:

• Google (Gemini API) — sun'iy intellekt bilan qayta ishlash. Biznes AI funksiyalarini yoqqan bo'lsa, Google'ga qayta ishlash uchun quyidagilar yuboriladi va natijasi qaytariladi: qo'ng'iroqlarning ovozli yozuvlari (matnga o'girish va sifat xulosasini olish uchun) hamda kiruvchi xabar va izohlarning matni, jumladan Messenger va Instagram Direct orqali kelganlari (javob loyihasini tayyorlash uchun). Google bu ma'lumotni o'z modellarini o'qitishda ishlatmaydi. Agar biznes AI funksiyalarini yoqmasa, Google'ga hech narsa yuborilmaydi.
• Google (Firebase Cloud Messaging) — xodimlarning qurilmalariga push-bildirishnoma yetkazish. Faqat qurilma tokeni va qisqa sarlavha yuboriladi, xabar mazmuni yuborilmaydi.
• Sipuni — telefoniya provayderi. Qo'ng'iroq ma'lumotlari va, agar biznes yozib olishni yoqqan bo'lsa, ovozli yozuvlar shu provayderdan keladi va o'sha yerda saqlanadi.
• Contabo GmbH (Germaniya) — hosting provayderi. Xizmatning serverlari va ma'lumotlar bazasi Contabo boshqaradigan Yevropa data-markazida joylashgan.

Facebook va Instagram ma'lumotlarini reklama tarmoqlariga, ma'lumot sotuvchilarga yoki Xizmatning ishlashiga aloqasi bo'lmagan hech kimga bermaymiz.

Ma'lumotlar saqlanishi va xavfsizligi

Barcha ma'lumotlar shifrlangan ulanish (HTTPS) orqali uzatiladi va xavfsiz serverlarda saqlanadi. Har bir biznesning ma'lumotlari boshqa bizneslarning ma'lumotlaridan alohida ajratilgan holda saqlanadi. Ma'lumotlar faqat vakolatli xodimlar (o'sha biznesning administratorlari va tegishli operatorlari) tomonidan ko'rilishi mumkin.

Ma'lumotlar qancha muddat saqlanadi

• Hisob faol ekan — mijoz yozuvlari, yozishmalar va qo'ng'iroqlar tarixi biznes Xizmatdan foydalanishda davom etgan muddat davomida saqlanadi, chunki ular o'sha biznesning o'z sotuv tarixini tashkil qiladi.
• Biznes hisobini yopganda — uning ma'lumotlari 90 kunichida o'chiriladi.
• Shaxsiy o'chirish so'rovi bo'yicha — yozuv 30 kun ichida o'chiriladi (pastga qarang).
• Zaxira nusxalar — o'chirilgan ma'lumot kunlik zaxira nusxalarda, kirish cheklangan serverlarda, yana 90 kungacha qolishi mumkin, shundan keyin bu nusxalar ham o'chiriladi.
• Sahifa uzilganda — Xizmat yangi Facebook/Instagram ma'lumotini olishni darhol to'xtatadi. Allaqachon kelgan ma'lumot esa yuqoridagi qoidalar bo'yicha o'chirilgunicha biznesning mijoz yozuvlari tarkibida qoladi.

Ma'lumotlarni o'chirish

Ma'lumotlaringizni o'chirishni so'rash huquqiga egasiz. So'rov kelgan kundan boshlab 30 kun ichida bajariladi va o'chirilgani haqida elektron pochta orqali tasdiq yuboriladi. Batafsil yo'riqnoma: asprocrm.uz/data-deletion.

Davlat organlari va huquqni muhofaza qilish so'rovlari

Davlat organlari yoki sudlardan foydalanuvchilarning shaxsiy ma'lumotlari bo'yicha so'rov kelishi mumkin. Har bir shunday so'rov uchun qoidamiz:

• Qonuniylik tekshiruvi — ma'lumot berishdan oldin har bir so'rovning qonuniy asosi (sud qarori yoki amaldagi qonunga muvofiq yozma so'rov) tekshiriladi. Norasmiy yoki tasdiqlab bo'lmaydigan so'rovlar rad etiladi.
• E'tiroz — haddan tashqari keng yoki qonuniy asossiz ko'ringan so'rovlarga e'tiroz bildiriladi va imkon qadar toraytiriladi.
• Minimallashtirish — faqat so'rov uchun qat'iy zarur bo'lgan minimal ma'lumot beriladi, to'liq eksport hech qachon berilmaydi.
• Hujjatlashtirish — har bir so'rov yozib boriladi: so'rovchi organ, qonuniy asosi va aynan nima berilgani.

Facebook / Instagram integratsiyasi orqali olingan ma'lumotlar (Meta platforma ma'lumotlari) faqat qonun talab qilganda beriladi va hech qachon ixtiyoriy ravishda taqdim etilmaydi.

Voyaga yetmaganlar

Xizmat biznes uchun mo'ljallangan vosita bo'lib, bolalarga qaratilmagan. 16 yoshga to'lmaganlarning ma'lumotlarini bila turib yig'maymiz. Bunday ma'lumot Xizmatga tushgani ma'lum bo'lsa, uni o'chiramiz.

Bog'lanish

Ushbu maxfiylik siyosati yoki ma'lumotlaringiz yuzasidan savollaringiz bo'lsa, biz bilan bog'laning: info@asprocrm.uz.